Власта и опозицијата во кавга и околу студија подготвена на барање на Комитетот за надворешна политика на Европскиот Парламент, во која профилот на социјалните мрежи на лидерот на ВМРО-ДПМНЕ Христијан Мицкоски, на Никола Груевски, како и неколку интернет портали се се извори на дезинформации.
„Ова е уште една потврда, уште едно демаскирање на кујната во белиот дворец во стечај, во која се готват лажни вести, измислици и дезинформации, на штета на националните и на државните интереси, на штета на граѓаните„ – соопштија од СДСМ.
Од ВМРО-ДПМНЕ одговорија дека “документот кој што вчера беше објавен и преставува анализа за состојбата со лажните вести во државите од Западниот Балкан, не е официјален став на Европскиот Парламент“.
Дезинформациите остануваат моќна сила кои ги нарушуваат состојбите во внатрешната политика во Северна Македонија, иако по промената на власта, тие се истуркани на маргините, се наведува во студијата, со наслов „Мапирање на лажните вести и дезинформации на Западниот Балкан и идентификување начини за борба со нив“, изработена од Генералниот директорат за надворешна политика на Европската Унија по нарачка на Европскиот парламент.
Во Студијата поименично се наведуваат медиумите финансирани од унгарски бизнисмени во Северна Македонија како главни извори на дезинформации, но исто така се посочува и на профилите на социјалните медиуми на повеќе личности, меѓу нив, и на лидерот на ВМРО-ДПМНЕ, Христијан Мицкоски.