Денеска Одделот за внатрешна контрола, криминалистички стандарди и професионални истраги во МВР до Основното јавно обвинителство за гонење на организиран криминал и корупција- Одделение за истражување и гонење на кривични дела сторени од лица со полициски овластувања поднесе кривична пријава против П.Г., полициски службеник вработен во СВР Битола поради основано сомнение дека сторил кривично дело малтретирање во вршење на служба предвидено во чл. 143 од Кривичниот законик поради неоснована употреба на физичка сила врз Ј.Н. од Битола.
Воедно против истиот полициски службеник е поведена постапка за утврдување на дисциплинска одговорност и суспензија од работното место. И против полицискиот службеник К.Г. кој непосредно бил присутен на местото на настанот и не преземал мерки за спречување на неоснованата употреба на физичка сила е поведена дисциплинска постапка и е суспендиран од работното место.
Министерството за внатрешни работи остро осудува било каков случај на насилство, особено кога тоа го направил полициски службеник и тоа строго се санкционира. Ниту еден ваков чин не може да се оправда!
„Министерството за внатрешни работи вложува многу во менувањето на ликот и однесувањето на полициските службеници и покажавме дека нема да дозволиме, дури и вакви изолирани случаи, да поминат без одговорност и соодветна казна. Нашата цел е полиција која ќе биде во служба на граѓаните, која ќе биде во функција на нивна поголема безбедност. Но, мораме да кажеме дека за жал сме сведоци и на се позачестени напади врз полициските службеници. Очигледно е дека зголеменото присуство на полицијата на терен и јасната порака дека влегуваме во пресметка со криминалот предизвикува реакција кај криминалците. Таков е и случајот со дрвокрадците во велешко кои вчера нападнаа петмина полициски службеници, од кои еден наш колега со сериозни повреди е во клиничкиот центар во Скопје“, рече на денешната прес – конференција министерот Оливер Спасовски.
Тој заедно со директорот на БЈБ Сашо Тасевски посетиле повредениот полицаец.
„Секој што ќе нападне полициски службеник кој се грижи за безбедноста на граѓаните, ќе се соочи со законот. Напад врз полициски службеник е сериозно кривично дело и такви постапки и однесување нема да се толерираат“, дециден беше Спасовски.