Горан Паскаљевиќ, истакнат српски и екс Ју режисер и сценарист, почина во Париз во 74 година од животот.
Студираше филмска режија на Прашката академија, а во неговата кариера оствари петнаесетина играни и повеќе од 30 документарни филмови и телевизиски драми. Негов прв игран филм во 1976 година е „Чуварот на плажата во зимскиот период“ . А, меѓу останатите познати филмски остварувања се вбројуваат: „ Кучето што ги сакаше возовите“, „Специјален третман“, „ Лажливо лето 68“, „Буре барут“, „Танго Аргентино“… Последен филм му е „ Наспроти маглата“, снимен минатата година во Италија.
Тој е добитник на многу значајни награди, вклучувајќи ја таа од критиката за најдобар европски филм во 1998 година, добиена за филмот „Буре барут“ , работен според драмата на нашиот драматичар Дејан Дуковски , како и наградата на фестивалот во Сан Себастијан, 1990 година, за филмот „Време на чудата“. Списанието „Варајети“ во 2001 година го прогласи за еден од петте најдобри режисери, а одликуван е со Францускиот орден за уметност и литература.
Горан Паскаљевиќ е првиот филмски режисер што во 2002 година во Минхен ја доби престижната награда „Бернард Вики Мост“, за промоција на хуманизмот во своите дела. Во неговото последно интервју за српски „ Новости“, Паскаљевиќ порача дека светот мора да поверува во добрината.
