Веднаш по галериите и музеите ги отворија вратите за посетителите. Со дезинфекција на рацете, задолжително растојание и одреден број посетители според здравствените протоколи и Археолошкиот музеј ги отвори вратите за „новата нормалност“.
Дозволено е влез на 15 посетители максимум на 100 метри квадратни. Во нашиот музеј среќа можеме да го обезбедиме тоа бидејќи се работи за голем простор. Дел од изложените експонати се во долниот дел, дел се во останатите два ката, вели Ива Лабан од Археолошки музеј на РСМ.
Во меѓувреме и покрај загрижувачките слики на социјалните мрежи со прослави и забави по ноќни клубови во време на пандемија, радува фактот дека најмладите кои беа принудени да останат дома со помош на своите родители учествуваа во проекти налик на оние во светски рамки кои ќе го разбудат интересот за археологијата во време во кое културните институции се обидуваа да најдат начин за новото нормално.
Започнавме со проектот музејска едукација преку цртежи. На наше огромно задоволство се вклучија околу 72 дечиња и ни стасаа околу 300 цртежи и секојдневно добиваме пораки кога ќе се отвори Музејот бидејќи со нетрпение сакаат да дојдат и да ги погледнат во живо артефактите кои ги цртале, вели Ива Лабан, Археолошки музеј на РСМ.
Музејските работници се надеваат дека „новата нормалност“ ќе биде предизвик за посетителите и барем во догледно време тие ќе се вратат во овие простори согледувајќи ги новите перспективи низ дијалогот на минатото и сегашноста во која Ковид 19 ја диктира „новата нормалност“.
Нина Стефанова