Во Собранието денеска почнува расправата за ребалансот на Буџетот за 2025 година, во второ читање, со над 200 поднесени амандмани. Владата предвидува приходи од 362,4 милијарди денари и капитални расходи од 47,5 милијарди, со проекција за раст на БДП од 3,7% и инфлација од 2,8%. Буџетскиот дефицит останува на нивото од 4% од БДП.
Министерката за финансии Димитриеска-Кочоска порача дека ребалансот е продолжение на дисциплинирана фискална политика, со намалување на јавниот долг и раст на економската активност.
Во првиот квартал од 2025 година е забележано намалување на јавниот долг за 36 милиони евра. Фајнанс Тинк пак вчера оцени дека проекциите за раст на даночните приходи се амбициозни, и додаваат дека растот на пензиите и платите во администрацијата може да ја вивнат инфлацијата.