Најмалку шест лица загинаа, а повеќе се повредени во ноќен напад со дронови и ракети врз украинската престолнина Киев, соопштија украинските служби за итни случаи.
Во нападот е оштетена станбена зграда во областа Шевченкивск, каде дел од објектот се урнал, а спасувачите сѐ уште трагаат по затрупани под рушевините. Градоначалникот на Киев, Виталиј Кличко, изјави дека се надева оти бројот на жртви нема да се зголеми, но дека потрагата продолжува.
Во градот Била Црква, 85 километри југозападно од Киев, во нападите загина уште едно лице, а осум се повредени. Ова е нов силен руски напад, кој доаѓа само една недела по смртоносниот напад во кој загинаа 28 лица во Киев, од кои 23 во урната станбена зграда. Украинскиот претседател Володимир Зеленски го нарече тој напад „еден од најголемите бомбардирања во војната“.
