Кардиналите на Католичката црква, кои пристигнаа во Рим од целиот свет, денеска ја одржуваат петтата Генерална конгрегација по смртта на папата Франциск. На состанокот кој почна утрово се очекува да биде утврден датумот за почеток на конклавата за избор на нов Папа. Според проценките на експертите, конклавата би можела да започне на 5 или 6 мај, веднаш по завршувањето на деветте дена на жалост што завршуваат на 4 мај.
Од смртта на папата Франциск досега се одржаа четири Генерални конгрегации на кои беа донесени одлуки за организацијата на погребот и други прашања поврзани со функционирање на Црквата.
Право на глас имаат 135 кардинали кои се помлади од 80 години, од вкупно 252 колку што брои Колегиумот на кардинали. Околу 80 отсто од кардиналите со право на глас се именувани од самиот папа Франциск, но тоа не гарантира дека ќе изберат наследник кој ќе ја продолжи неговата визија. Помалку од половина од гласачите доаѓаат од Европа.
Изборот на новиот папа ќе се одвива во Сикстинската капела под фреските од 16. век на Микеланџело. Гласањето е строго тајно и се спроведува според строги правила и церемонијални процедури. Секој ден се одржуваат четири гласања, две наутро и две попладне, сѐ додека еден кандидат не добие двотретинско мнозинство.