Лидерите на ЕУ повикаа на максимално искористување на новата динамика во процесот на проширување, базиран на заслуги. Во заклучоците, Европскиот совет ја потврди стратешката важност на проширувањето како инвестиција за мир, безбедност и просперитет.
На самитот кој се одржа вчера беше осудена хибридната кампања на Русија, која вклучува саботажи, сајбер напади и манипулации со информации, и најавија нови санкции против нејзините дестабилизирачки активности.
Европскиот совет ја изрази загриженоста за ситуацијата во Грузија, повикувајќи на почитување на демократските принципи и на промена на курсот на грузиските власти за да се обезбеди напредок во процесот на пристапување во ЕУ. Лидерите ја потврдија и својата поддршка за европските аспирации на Молдавија.
Во однос на миграцијата, Европскиот совет ја нагласи потребата за поинтензивна борба против нерегуларната миграција и забрзување на депортацијата во земјите на потекло. Лидерите дискутираа и за глобалните безбедносни и климатски предизвици, нагласувајќи потреба од зајакнување на воената и цивилната подготвеност на ЕУ за справување со кризи.
