Застапаност на етничките заедници во сите институции мора да има и добро е да има, е ставот на Арбен Таравари, претседател на Алијанса на Албанците (АА), кој го повтори и во вечерашната „Топ тема“ на Телма ТВ во контекст на балансерот.
„Колку што знам, балансерот е воведен во 2006 година од ВМРО-ДПМНЕ, овој механизам кој што се користи сега. Доколку имаме друг метод, инструмент, алатка со која истовремено ќе се воведат и етничката застапеност и меритокрацијата, ние сме подготвени да разговараме“, рече Таравари.
Како што потенцира лидерот на АА, балансерот е злоупотребен од сите страни.
„Ако сакаме да ја поправиме администрацијата, време е да почнеме со меритокрација. Имаме доста бавна администрација. Не би сакал да генерализирам. И во неа има доста прекрасни луѓе кои што работат како што треба, меѓутоа не е баш добро функционална, бидејќи е максимално политизирана и партизирана“, смета Таравари, според кого една од обврските во наредните четири години е деполитизација и департизација, меѓутоа, како што додаде – „етничка застапеност мора да има, како и меритокрација“.
