Во Скопје стапуваат на сила мерките и препораките поради зголеменото аерозагадување, односно пореади зголемената концентрација на ПМ 10 честички во текот на два последователни дена, информираат од Министерството за животна средина и просторно планирање (МЖСПП).
Во двата дена, како што соопштуваат од Министерството, на 25 и 26 декември се измерени повеќе од 150 микрограми на кубен метар ПМ 10 честички, со што се надминува прагот на алармирање.
Поради зголеменото аерозагадување, се препорачува работодавците да ги ослободат од работа бремените жени, лицата постари од 60 години, како и лицата со хронична астма, прележан миокарден инфаркт или мозочен удар, без разлика на возраста, со препорака на матичен лекар. Се препорачува и реорганизирање на работното време, а лицата кои работат на отворено да работат од 11:00 до 17:00 часот.
Дел од препораките се и да не се организираат спортски и други манифестации на отворено и да се обезбедат услови за зголемени активности на службите за итна медицинска помош, домашна посета и патронажна служба.
Во делот од мерките, се посочува Владата да ги задолжи сите органи на државна управа и единиците на локална самоуправа да ја намалат (до 50 отсто) употребата на службените возила, како и да обезбеди ограничување на работите на градежните објекти.