Добро сме во планирање, но имаме слабости во реализацијата. Имплементацијата не е проблем само во делот на воздухот, тоа сме го утврдиле и во сите други области во животната средина, такво нешто де факто потврдува и Европската комисија во годишните извештаи наназад, изјави Каја Шукова, министерка за животна средина и просторно планирање, во вечерашната Топ тема на ТВ Телма.
„Во дело на воздухот, она што државата може да го прави, во изминатите неколку години го прави. Обезбедува финансиски средства и во рамки на своите можности ги имплементира тие средства. Станува збор за домашни средства, во последните години сме фокусирани на донаторски средства, бидејќи ги имаме повеќе“, рече Шукова.
Таа истакна дека во моментот се активни неколку проекти, со поголеми капитални средства кои се директно за намалување на загадувањето на воздухот.
„Добивме средства од проект од Европската унија за четирите поголеми градови во државата – Скопје, Куманово, Битола и Тетово. Проектот во висина од 10 милиони евра има повеќе компоненти. Едната е замена на нееколошките системи со еколошки системи, нови зелени површини, набавка на нови автобуси. Покрај овој проект, има уште неколку активни. Интенција на министерството во изминатите неколку години, кога се планираа проектите за намалување на загадувањето на воздухот, е насочување на средствата за замена на нееколошките системи. Проблем не е само затоплувањето. Тоа го кажуваме ние, тоа го кажуваат и невладините организации. Се има влијание. Влијание има енергетиката, има влијание транспортниот сектор, има влијание земјоделието, отпадот. За жал, некогаш намерно се палат и горат и општинските депонии и дивите депонии. Има мнофу фактори“, нагласи Шукова.
