Склучен е досега најголемиот тендер за ископ во последните неколку години. Тендерот го распиша ЕСМ, а битолската фирма „Марковски компани“ ќе има обврска да ископа четири милиони кубни метри јаловина. Вредноста на договорот е речиси 25 милиони евра со вклучен ДДВ. Но, ЕСМ не мора да го реализира во целост до оваа сума.
Исто така, според договорот, „Марковски компани“ има обврска да ангажира лица за да ја завршат работата, да обезбеди механизација, редовна исплата на плати, опрема за работа и друго. Ако не се придржува кон договреното ќе треба да плаќа пенали. Во договорот три фирми се јавуваат како подизведувачи.
Според дел од медиумите, првите луѓе на двете фирми кои се од Струмица се поврзани со поранешниот премиер Заев. Прашавме и во ЕСМ зошто вредноста на договорот е толку голема, но од таму одговор нема.
Ова не е прв пат битолската фирма „Марковски компани“ да биде избрана на тендер за ископ.
