Како на регрутација за во војска, ама униформата ќе биде работна со симболот на „Бехтел&Енка“, а платата од овој конзорциум, со пари од државниот буџет. Наместо со лопата и црвена машничка, проектот Коридор 8 и 10 Д, речиси половина година по потпишувањето на договорот, почна со саем за вработување. Засега не се открива колкава точна бројка на вработени им треба и кои компании ќе чепнат од бизнисот вреден околу милијарда и триста милиони евра.
Секако тука да припомогне е и првиот вицепремиер, задолжен за проектот.
Интерес меѓу граѓаните имаше, но не и да се каже нешто пред камерата на Телма, а еден од анкетираните дури тврдеше дека не е битно дали ќе работи 40 часа неделно како што е по закон, или 60 часа и повеќе како што инсистираше американско-турскиот конзорциум.
Најбитното прашање е кога ќе почне изградбата. Од „Бехтел&Енка“ одговараат, се прави планот за експропријација, а прецизен одговор нема, се бројат недели.
Граѓаните очекуваа дека за неколку недели ќе се решат и спорните прашања во договорот за надзор во кој учествуваат домашни фирми со никакво искуство во градежништво и луѓе кои се на потерници за кривични дела поврзани со градежништво, како и спорната одредба за предолга работна недела, за што повторно ќе расправа и Уставниот суд. Сè уште се чека на резултати за расчистување на контроверзите со овој проект кој треба да заврши за помалку од пет години и во тој период Македонија да добие околу 109 километри нов автопат.
Миомир Серафиновиќ