Украинскиот претседател Володимир Зеленски пред новинарите го покажа своето привремено сместување во кое, како што вели, живее од почетокот на војната, објави агенцијата ДПА.
„Овде живеам“, рече Зеленски во филмот на новинарот Дмитри Комаров кој беше емитуван на украинската телевизија „1+1“.
Украинскиот претседател кажа дека таму е од 24 февруари во 2022 година, кога почна руската инвазија на неговата земја.
Извадок од филмот објави Антон Герашченко, советник на Зеленски, за внатрешнополитички прашања.
Прозорците од импровизираното сместување на Зеленски се орекриени со дебели завеси. На креветот за едно лице има перници и прекривка со цветови, а во собата може да се забележат телевизор и работна маса.
Зеленски во филмот го покажува и својот шкаф со гардероба во кој висат маслинесто зелени и маскирни јакни, а на подот има и војнички чизми.
„Ова е мојата „редовна гардероба“. Моментно не носам костуми“, вели Зеленски.
Но, во еден момент од левата страна на шкафот, украинскиот претседател извлекува костум и вели:„Ова е симбол дека војната наскоро ќе заврши. Ние ќе победиме“, порача Зеленски низ насмевка.
“This is where I’ve been living for a year” – @ZelenskyyUa showed Ukrainian journalist Dmytro Komarov his wartime living conditions and his wardrobe. pic.twitter.com/0McF8EEHUf
— Anton Gerashchenko (@Gerashchenko_en) February 25, 2023