Од Град Скопје информираат за новите смени на директори. Разрешен е в.д. директорот на ЈП „Водовод и Канализација“, Марјанчо Митовски, и на негово место доаѓа Драган Илиевски, кој досега беше директор на Зоолошката градина во Скопје. Според Градот, Драган Илиевски е машински инженер со повеќе од 20 години работно искуство, додека досегашниот директор Митровски, кој на позицијата беше назначен од редот на вработените продолжува со ангажман како секторски директор на претпријатието.
Нов директор на Зоолошката градина е Зоран Попов, кој доаѓа од редот на вработените и е економист исто така со 20 години работно искуство, а во МКЦ ќе биде назначен нов директор по евалуацијата на биографиите за позицијата.
Косана Мазнева назначена е со нов мандат и продолжува да ја извршува функцијата директор на јавното претпријатие Комунална Хигиена.
