Разорните пожари кои денови наназад ја зафатија областа Измир во Турција се ставени под контрола, соопшти турската влада утрово. Иако пожарникарите успеаја да ја стабилизираат ситуацијата во западниот дел на земјата, борбата со огнот продолжува во југоисточната провинција Хатај, каде што нов пожар избувна во петокот попладне и брзо се прошири поради силните ветрови.
Спасувачките екипи работеа непрекинато во текот на ноќта во Хатај, каде што досега се евакуирани девет населени места и речиси 2.000 лица.
Гувернерот на покраината изјави дека комплицираната планинска топографија и високите температури го отежнуваат гаснењето на пожарите, кои и натаму претставуваат сериозна закана за населението и природата.
Во изминатите неколку дена, ширум Турција се пријавени стотици пожари, од кои десет се класифицирани како големи шумски пожари.
Измир беше најтешко погоден регион, каде што веќе се потврдени три жртви и бројни повредени.
Пожарите уништија огромни шумски површини, изгореа три села и предизвикаа сериозни штети врз добитокот и дивиот свет.