Американскиот претседател Доналд Трамп изјави дека Израел ги прифатил „неопходните услови“ за постигнување 60-дневен прекин на огнот во Газа. Според него, Катар и Египет ќе го достават финалниот предлог за договорот, кој треба да доведе до крај на војната.
„Се надевам дека Хамас ќе го прифати договорот, бидејќи подобра понуда нема да има – само ќе биде полошо“, порача Трамп преку платформата „Truth Social“. Израелскиот амбасадор во ОН, Дани Данон, изјави дека Израел е „апсолутно подготвен“ за примирје, но останува неизвесно дали Хамас ќе ги прифати условите.
Тој додаде дека „војната ќе заврши кога сите заложници ќе бидат вратени дома“, посочувајќи дека Хамас и натаму „игра тврдо“. Договорот доаѓа во пресрет на планираната средба на Трамп со израелскиот премиер Бенјамин Нетанјаху следната недела, на која Трамп најави дека ќе биде „многу цврст“ во својот став.
Израел бара целосно разоружување на Хамас, додека палестинската страна инсистира на траен прекин на огнот и целосно повлекување на израелските сили од Газа.
