Украинскиот претседател Володимир Зеленски, потпиша декрет за повлекување на земјата од Отавската конвенција, која забранува производство и употреба на противпешадиски мини.
Украина ја ратификуваше конвенцијата во 2005 година.
Поддржете го предлогот на Министерството за надворешни работи на Украина за повлекување на Украина од Конвенцијата за забрана на употреба, складирање, производство и пренос на противпешадиски мини и за нивно уништување од 18 септември 1997 година, се наведува во декретот објавен на веб-страницата на Зеленски.
Високиот украински функционер Роман Костенко изјави дека за повлекување од договорот е потребна согласност од парламентот.
Ова е чекор што воената реалност одамна го бара. Русија не е страна на оваа Конвенција и масовно користи мини против нашите војници и цивили, напиша Костенко, секретар на парламентарниот комитет за национална безбедност, одбрана и разузнавање, на својата Фејсбук страница.
Не можеме да останеме врзани во опкружување каде што непријателот нема никакви ограничувања, додаде тој, истакнувајќи дека законодавната одлука мора конечно да ѝ го врати на Украина правото на ефикасна одбрана на својата територија.
Костенко не наведе кога ќе се расправа за ова прашање во парламентот.