Во јужниот дел на Шпанија викендов е регистриран нов национален рекорд на високи температури, откако живата во термометарот се искачи на 46 степени Целзиусови во градот Ел Гранадо, во близина на португалската граница.
Шпанската државна метеоролошка агенција AEMET денеска го потврди рекордот, додека и Шпанија и Португалија се справуваат со невообичаено ран и интензивен летен топлотен бран. Претходниот јунски максимум во Шпанија од 45,2 степени беше поставен во Севиља во 1965 година.
Десетици градови низ Шпанија пријавија максимални температури над 40 степени, додека соседна Португалија исто така беше зафатена од жештини. Во туристичкиот регион Алгарве на југот на земјата, највисоките температури достигнаа околу 40 степени.
На шпанскиот остров Мајорка, температурите се искачија на речиси 35 степени.
На југот на Шпанија, ноќните минимални температури останаа над 30 степени – ниво на постојана топлина што, според експертите, може да претставува сериозни здравствени ризици.
Локалното население е навикнато да се справува со екстремните температури со ограничување на активностите на отворено за време на најголемите горештини, носење лесна облека и често хидрирање.
Сепак, комбинацијата од екстремна топлина и интензивно сонце брзо ја суши почвата и вегетацијата, нагло зголемувајќи го ризикот од шумски пожари.
Метеоролозите предупредуваат дека ваквите топлотни бранови стануваат почести и пристигнуваат порано во сезоната поради климатските промени предизвикани од човекот.
Според AEMET, само два топлотни бранови биле забележани во јуни помеѓу 1975 и 2000 година.
Помеѓу 2000 и 2024 година, тој број се зголеми на девет. Оваа година, уште кон крајот на мај температурите се приближија до нивоата од август.