САД тврди дека постигнала договор со Кина за забрзување на испораките на ретки земни метали, изјави функционер на Белата куќа, во екот на напорите за прекин на трговската војна меѓу најголемите економии во светот.
Претседателот Доналд Трамп претходно изјави дека САД во средата потпишале договор со Кина, без да даде дополнителни детали и дека може да се постигне посебен договор што ќе ја „отвори“ Индија.
За време на разговорите во Женева во мај, Кина вети дека ќе ги отстрани нетарифните контрамерки наметнати на САД од 2 април, иако не беше јасно како ќе ги поништи некои од тие мерки.
Имено, како дел од својата одмазда на новите американски царини, Кина го суспендираше извозот на широк спектар критични минерали и магнети, со што ги наруши синџирите на снабдување кои се клучни за автомобилската, полупроводничката, воздухопловната и воената индустрија.
„Американската администрација и Кина се согласија за дополнителен рамковен договор за спроведување на Женевскиот договор“, изјави функционер на Белата куќа за британските медиуми, додавајќи дека договорот се однесува на тоа „како повторно да ги забрзаме испораките на ретки земни метали во САД“.
Друг функционер на администрацијата изјави дека договорот меѓу САД и Кина е постигнат претходно оваа недела.