„Фајненшл тајмс“ пренесува тврдења на неименувани европски претставници дека залихите на збогатен ураниум на Иран останале, речиси, недопрени.
Медиумот наведува и дека 408 килограми збогатен ураниум никогаш и не се наоѓале на локацијата „Фордо“, комплекс длабок 100-тина метри под гранитна планина, чии влезови Американците ги затрупаа со бомби ГБУ-57, секоја тешка по 13.600 килограми.
Инспектори на Меѓународната агенција за атомска енергија (ИАЕА) тврдат дека недела дена пред нападот го виделе материјалот. Шефот на организацијата, Рафаел Гроси, пак, смета дека е „скриен некаде околу Исфахан“.
„Иран никогаш не криеше дека го сокри материјалот“, рече Гроси за „Си-Ен-Ен“.
Станува збор за збогатен ураниум, сместен во посебни сандаци, кои без проблем може да се натоварат во 10-тина камиони.
На сателитски снимки на нуклеарната постројка „Фордо“, кои ги објави компанијата „Максар технолоџис“ на неколку пред почетокот на „12-дневната војна“, се гледаат 16 паркирани камиони пред влезовите на објектот. Нејасно е дали во таа прилика е изнесено нешто од подземните бункери.
Нејасно е дали и подземниот комплекс јужно од Натанз, во кој сè уште не влегле инспектори на ИАЕА, бил мета на американските и израелските воздушни напади, како и во колкава мера е забавена иранската нуклеарна програма, имајќи го предвид фактот дека најмалку 15 ирански нуклеарни физичари беа убиени во последните две недели.
Неизвесно е и на кој начин меѓународната заедница ќе прави контрола на иранската нуклеарна програма, бидејќи парламентот во Техеран одлучи да ја прекине соработката со ИАЕА.