Најмалку 22 лица загинаа, а повеќе од 60 се повредени во самоубиствен терористички напад извршен во текот на богослужба во грчката православна црква во Дамаск. Според сириското Министерство за здравство, напаѓачот прво отворил оган врз присутните, а потоа активирал експлозивен појас.
Во црквата, во моментот на нападот, имало околу 350 верници. Црквата која била мета на напаѓачот е една од најголемите и најпосетувани православни цркви во Дамаск.
Бомбата, според властите, експлодирала на влезот од објектот, што предизвикало жртви и надвор од храмот. Досега ниедна терористичка организација не ја презела одговорноста, иако властите посочуваат дека напаѓачот имал поврзаност со Исламска држава.
Сириската влада го нарече нападот „обид за дестабилизација на земјата“ по падот на режимот на Башар ал-Асад во декември, обвинувајќи ги преостанатите лојалистички и терористички структури за обид да се предизвика страв и хаос.
