Унгарската полиција соопшти дека ја забранила Парадата на гордоста на ЛГБТ заедницата во Будимпешта, што беше планирана на 28 јуни, пренесува „Ројтерс“.
Во полициското соопштение се наведува дека „не може да биде исклучено, а можеби и неизбежно, лицата помлади од 18 години да може да учествуваат во забранети активности со закон“. Се додава дека прошетката би можела да доведе до „пасивни жртви“, односно луѓе кои не сакаат да бидат дел од настанот, но поради јавниот карактер на Парадата би биле принудени да бидат набљудувачи, пишува бриселски Јуроњуз.
Град Будимпешта претходно најави дека ќе ја организира традиционалната манифестација како официјален градски настан во знак на прослава на слободата.
Унгарскиот парламент во кој партијата Фидес на премиерот Виктор Орбан има големо мнозинство, во март усвои закон кој ѝ овозможува на полицијата да забрани ЛГБТ парада со образложение за наводна заштита на децата.
