Израел ги интензивираше нападите врз Иран во текот на ноќта, откако американскиот претседател Доналд Трамп побара од Иран безусловно предавање, во исто време разгледувајќи ја можноста за приклучување на Тел Авив во воздушните напади врз Исламската република.
Иранците не се народ кој се предава, порача Ајатолахот Али Хаменеи во соопштение прочитано на државната телевизија. Најголемиот дел од иранските функционери изминативе денови не излегуваат во јавност, па пораките на режимот упатени кон западните земји ги пренесуваат неговите дипломати.
„Изјавите на Доналд Трамп се сосема неоправдани и многу непријателски. Не можеме да ги игнорираме. Внимателно следиме што зборува Доналд Трамп, го вклучуваме тоа во нашите пресметки, во нашите проценки. Постои линија, која ако биде премината ќе следува одговор од наша страна“, изјави Али Бахреини, aмбасадор на Иран во Женева.
Во текот на ноќта преку социјалните мрежи Трамп ја повтори израелската закана по животот врз ајатолахот Али Хаменеи, порачувајќи дека знаат каде се крие, но засега нема да го убијат. Но, и покрај воинствената реторика на американскиот претседател, неговата администрација е поделена во однос на евентуалната воена интервенција на страната на Израел.
„Не сум видел изјава од Пит Хегсет или било кој друг за тоа какво би можело да биде правното овластување за ваков напад. Исто така е јасно дека многу од поддржувачите на претседателот Трамп, вклучувајќи и некои од неговите највисоки советници, не се многу заинтересирани САД да се вмешаат во, како што велат, уште една војна на Блискиот Исток или како што ги нарекуваат „вечните војни“, смета Томас Варик од Атлантски совет.
Соочени со сè поинтензивни израелски воздушни напади, Иран забележливо го намалува обемот на ракети кои ги лансира кон Израел. Дали тоа е резултат израелскиот успех да неутрализира голем дел од ракетниот арсенал, или не, Техеран не открива. Сепак, Револуционерната гарда по синоќешното ракетно салво тврдеше дека Иран владее со небото над окупираните територии.
„Вечерва моќните и маневрирачки ракети „Фатах“ ги потресоа засолништата на Ционистичките кукавици откако го пробија нивниот антиракетен штит, испраќајќи моќна порака до сојузникот на Тел Авив кој подбуцнува војна, изгубени во нивните заблуди и празни фантазии“, полковник Иман Таџик, портпарол на операцијата „Вистинско ветување 3“.
Иранските тврдења за голема штета врз Израел не можат да бидат потврдени, затоа што Тел Авив не им дозволува на медиумите да снимаат ниту емитуваат снимки од погодените места.
Израелските владини и воени претставници, како и безбедносните експерти продолжуваат да инсистираат дека Израел победува во оваа војна, но во исто време голем дел од нивните дипломатски напори се насочени кон тоа да ги убедат САД да се приклучат во воздушните напади.
„Ова е кралството на теророт, ова е регионалниот агресор, ништо преку дипломатските канали не успева со нив, ништо. Не престануваат да се приближуваат до нуклеарно оружје, и ние не можеме да ја ставиме иднината на нашата нација во рацете на луѓе кои посакуваат смрт за Израел и смрт за Америка, и навистина го мислат тоа“, порача Јоав Галант, поранешен министер за одбрана на Израел.
Според американските медиуми, планот на САД е трајно затворање на овој конфликт на Блискиот Исток, а за неговото остварување подготвуваа два дијаметрално спротивни пристапи, дипломатски и воен.
Дипломатскиот се состои во подготвување на пакет спогодби, на кои се надеваат дека ќе го принудат режимот да се согласи. Во тој пакет меѓу другото САД ќе побараат Техеран трајно да се откаже од својата нуклеарна програма и да ја препушти контролата врз капацитетите за збогатување ураниум, а во замена Вашингтон ќе ги повлече економските санкции.
Другиот пристап е воениот. Американската армија веќе транспортирала 30-на ер танкери во Европа, а морнарицата го пренасочи носачот УСС Нимиц и неговите 5 разурнувачи од Јужното Кинеско море во источниот Медитеран.
Игор Трајков