Шестата рунда преговори за нуклеарната програма меѓу САД и Иран, планирана за утре во Оман, е откажана, соопшти министерот за надворешни работи на Оман, Бадр Албусаиди.
„Преговорите меѓу Иран и САД, закажани за во Мускат в недела, сега нема да се одржат“, напиша Албусаиди на платформата Икс, додавајќи: „Но, дипломатијата и дијалогот остануваат единствениот пат до траен мир“.
Преговорите, во кои Оман посредуваше, беа нарушени од израелските напади врз иранските нуклеарни објекти.
Иранското Министерство за надворешни работи претходно денеска соопшти дека учеството во нуклеарни преговори со САД е „бесмислено“ додека Израел продолжува со напади врз Иран.
– Очигледно е дека во вакви околности, додека ционистичкиот режим врши агресија врз иранскиот народ, нема логика да се разговара со страна која е најголем поддржувач и соучесник на агресорот, изјави портпаролот Есмаил Бакеи.
Шефот на иранската дипломатија, Абас Арагчи, додаде дека „нема оправдување“ за продолжување на индиректните преговори додека трае „варварското однесување“ на Израел.