Веќе два месеци во Македонија недостасува сирупот „Депакин“ кој го користат децата болни од епилепсија. Лекарите им препишуваат таблетарна терапија за возрасни, но родителите реагираат дека таа не е соодветна и се плашат дека ќе го загрозат здравјето на нивните деца. Залихи нема, а бројот на епилептични напади кај децата без терапија се зголемува.
„Моето дете четири дена немаше терапија. Лекот не успеав да го набавам на време. Во Косово стигна предоцна, откако моето дете веќе доживеа напад. Искрено лично мислам дека голем број од малите деца кои го користат овој сируп заради недостаток сигурно имаат напади, а на дел од нив и животот им е во ризик“, изјави Александра Кардула, родител на дете со епилепсија.
Ретки се оние кои можат лекот да го купат во соседните држави, најчесто од Косово или од Грција. Но и таму лекот почнува да го снемува од аптекарските рафтови.
„Десетина мајки не можат да го набават лекот бидејќи не може да си дозволат да отидат во Солун и да платат огромни пари, ниту пак имаат познаници за да се снајдат преку нив. Македонските пациенти едноставно ги испокрадоа косовските пациенти бидејќи јас добив одговор од аптека во Косово дека оние веќе немаат лекови ни за нивните деца“, додаде Кардула.
Проблемот го потврдуваат и во аптеките. Повеќето од нив ни кажаа дека сирупот го нема подолго време и не знаат кога ќе пристигне нова пратка. Иако „Депакин“ е на позитивната листа и во државна аптека чини под 40 денари, на приватно може да достигне цена до 600 денари – но моментално го нема.
Сирупот има два дистрибутери во земјава, но и тие не даваат одговор. Наместо информации, не упатија до нивното претставништво, од каде по одговори не вратија назад кај дистрибутерите.
Ова не е првпат децата со епилепсија да останат без терапија. Со овој проблем биле соочени и пред околу две години, тогаш без терапија биле оставени два месеци.
Тамара Марковска