„Системот заборава, ние не“ e слоганот под кој иницијативата „Кој е следен?“ најави уште еден протест што ќе се одржи денеска во 18 часот пред Владата. Од таму предвиден е марш преку Судскиот совет и Собранието до Кривичниот суд.
„Системот заборава, но ние не забораваме. Ние ја паметиме секоја колективна траума што политичарите ја користат за поделби. Секоја лага што ја шират за да не исплашат, секоја неправда со која сакаат да не замолчат“, се вели во најавата на протестот.
Од таму додаваат дека два месеца граѓаните бараат промена, „но ништо не се менува“.
„По четири протести, несреќите се зголемија. По три форуми, неправдата порасна. По одржаното Народно Собрание, пратениците станаа уште потивки“, велат од „Кој е следен?“ од каде ги повикаа сите граѓани да излезат и да дадат поддршка.
