Дами, секогаш да бидете свесни за вашата вредност и никогаш да не дозволите некој да си игра со вас. Ова е пораката од директорот на НУБ, Јовица Никчевски, упатена до неговите колешки и останатите присутни жени, на денешното отворање на изложбата, со која оваа нацинална установа се вклучи во прославата на утрешниот празник, 8 Март – Меѓународниот ден на жената.
Дами поради кои машкиот свет заради вашата убавина трепери , вашата љубов го расте човештвото, вие не сте само поубавиот пол, вие како дами сте и понешниот пол, меѓутоа и посилниот и помоќниот. Ви препорачувам секогаш да бидете свесни за вашата вредност. И никогаш да не дозволите некој да си игра со вас, кажа Јовица Никчевски, директор на НУБ „ Свети Климент Охридски“.
На изложбата „Убавите жени во мојот народ“, насловена според првиот стих од истоимената песна на Блаже Конески, е претставен дел од движното културно наследство, кое го чува НУБ „Свети Климент Охридски“.
Станува збор за изложба од мултимедијален карактер. Таа вклучува творби од 3 збирки на НУБ. Од збирката за современи авторски ракописи, музичката и од збирката за визуелни уметности.
Во витрите украсени со рози или каранфили, се претставени ракописи од песни, но и стихозбирки од првите македонски поетеси и писателки: Евгенија Шуплинова, Радмила Трифуновска, Светлана Христова- Јоциќ, Драгица Најчевска и Гордана Михаилова- Бошнакоска.
Грамофонски плочи, компакт дискови, партитури и монографски изданија сведочат за посветеноста и вредноста на солистките: Милка Ефтимова, Нина Спирова, Есма Реџепова, Маја Оџаклиевска, композиторките Јана Андреевска и Дарија Андовска и од научните работнички во сферата на музиката и балетот: Родна Величковска, Емилија Џипунова, Соња Здравкова – Џепаровска и Татјана Грковска.
А, слики од Анета Светиева и Славица Јанешлиева, како и публикации од истражувањата за визуелните уметности од Вера Битракова, Елизабета Димитрова и Соња Абаџиева, чинат дел од богатото македонско творештво, прикажано на изложбата.
На отворањето беше прочина песната од Конески „Убавите жени“, а се зборуваше и за историјатот на празникот 8 Март, кој годинава одбележува 50 години, откако бил прогласен од Обединетите нации.
Изложбата „ Убавите жени во мојот народ“ , во НУБ ќе биде отворена следниве две седмици.
Сотир Трајков