Енеа Бастијанини триумфираше на трката за Големата награда на Емилија Ромања во Мото ГП шампионатот и тоа пред лидерот во генералниот пласман Хорхе Мартин, додека бранителот на титулата Франческо Бањаја не ја заврши трката.
Бастијанини во Мизано дојде до драматична победа и тоа во последниот круг откако успеа да го победи Мартин во директен дуел со мал контакт. За Италијанецот ова беше седми триумф во кариерата во Мото ГП, а на фабричкиот тим на Дукати му ја донесе јубилејната 100-та победа во историјата. Актуелниот светски шампион Бањаја излета од патеката на седум круга до крајот додека беше на 3.место, па на подиумот на крајот се искачи Марк Маркез.
Во поени влегоа и Марко Бецеки, Франко Морбидели, Маверик Вињалес, Фабио Квартараро, Алеиш Еспаргаро и Алекс Маркез.
Во генералниот поредок Мартин сега има 341 бод на првото место и ја зголеми предноста пред Бањаја, кој има 24 бодови помалку. Бастијанини е трет во поредокот со 282 бода, а Марк Маркез има само еден бод помалку.
Следната, 15-та сезонска трка се вози за Големата награда на Индонезија идниот викенд.