Низа обвинувања за лична дискредитација, нарушен углед и омаловажување меѓусебно денеска си разменија претседателката на Судскиот совет, Весна Дамева и судијата Лазар Нанев. Во центарот на превирањата првиот братучед на Дамева, Љупчо Грков, кој се бара со меѓународната потерница. Дамева побара утврдување на одговорност за Нанев, поради неговиот обвинувања дека Судскиот совет не го заштитил од заканите од нејзиниот братучед и дека таа влијаела на барањето за екстрадиција на Грков и со тоа го нарушил нејзиниот углед и угледот на Судскиот совет.
Дамева посочи дека е неспорен факт оти Грков е нејзин роднина, но таа поради неговото однесување не е во комуникација со него од 2017 година и дека Нанев заштита требало да бара од надлежните институции.
Нанев изјави дека неколку години Грков му се заканувал со убиство, а не било поштедено ниту неговото семејство. Грков, кој е во Лондон е осуден на затвор од 1 година за загрозување на сигурноста на Нанев.
Во еден момент на денешната расправа атмосферата се вжешти кога Дамева реагираше дека Нанев премногу гласно зборува и ја плаши.
Дамева го обвини Нанев дека целта на сето ова му е да влијае на другата постапка во Судскиот совет која се води против него за несовесно и нестручно вршење на функцијата, односно остварил 95 телефонски повици со обвинетиот Ванчо Кузманов во случај кој го водел.
Нанев се правдаше дека кога се случиле телефонските повици со Кузманов тој бил осомничен. Причината за утврдувањето на одговорноста од страна на Дамева, според него, е со цел тој да не напредува во службата.
Нанев во меѓувреме го ослободил Кузманов од обвинението за недозволено пренесување на акцизно добро.
Марија Митевска