Македонската кошаркарска репрезентација до 18 години ова лето беше вистински хит откако го освои Европското првенство Б-дивизија што се одржуваше во Скопје и тоа со максимални 8 победи.
Златниот медал и пласманот во А-дивизијата беа остварени во тешки услови и по трнлив пат иако Македонија и Кошаркарската федерација беа организатори на турнирот.
Селекторот на оваа златна генерација, Горан Аднреевски во интерјву за порталот СПОРТ1.МК укажува за ужасните услови на тимот пред Европското првенство и за време на турнирот. Тој исто така упати и низа обвинувања кон нашата кошаркарска федерација за третманот на овие неверојатно талентирани кошаркари.
„Не ми е јасно зошто иако како домаќини можевме да избираме, цело време трениравме и најголемиот дел од средбите ги игравме во Кале, каде што климата не постигнуваше и беше ‘милион степени’ што дополнително ги исцрпуваше кошаркарите. За разлика од ‘Борис Трајковски’, која беше целосно климатизирана и каде што ќе имавме врвни услови. Но, некој како да сакал да немаме добри услови и дека треба да се потиме во пеколот. А, можевме да бираме и место и термин кога ќе играме. Истото се однесува и за хотелот во кој бевме сместени за време од првенството – од трите понудени некој ја смести Македонија во убедливо најлошиот. А организатори беа луѓето од КФМ. Зошто тоа беше така – не знам“, вели Андреевски.
„Уште не ми е јасно зошто нѐ сместија во најлошиот хотел, каде што храната беше ужасна. На мојата реакција до КФМ ми рекоа да не се грижам и дека сѐ ќе се среди, ама остана само на празни зборови. Тоа што најважно за млади момчиња во тренажен процес, како месо, зеленчук и овошје, како и да го немаше. Слободно тврдам дека нашите кошаркари за зеленчук и овошје ги добиваа скапаниците, да не кажам ѓубрето што останува на пазарите на крај од работниот ден“, додава селекторот.
Целосниот текст можете да го прочитате на СПОРТ1.МК.