Да се пренаменат парите од пругата кон Бугарија за други проекти нема да може, трвди министерката за финансии Кочоска. Изминативе денови премиерот Мицкоски зборуваше дека нема намера да потроши 550 милиони евра за пруга која завршува во слепа улица и смета дека средствата треба да се употребат за други работи. Ја спомена модернизацијата на Коридорот 10. На иста линија е и министерот за транспорт Николовски.
Кочоска пак тврди дека со кредиторите може да се зборува само за нов заем, но не и за пренамена на средствата за железницата.
-Ги слушам изјавите но не е така. Вие кога барате наменски кредит не може за друго да го користите. Исто е и во овој случај. Може само да ги замолиме да ги резервираат парите и да аплицираме за нов заем, но да се пренаменат не може, изјави на брифинг со новинарите министерката за финансии Гордана Димитриеска Кочоска
Веќе имало и средба со Европската инвестициска банка каде што биле на маса ставени сите аргументи зошто пругата кон Бугарија не треба да се гради.
Тоа е траса од Драч во Албанија до Бургас во Бугарија. Хипотетички ќе ја направиме но што добиваме економски. Од Европската инвестициска банка ми кажуваат дека е тоа НАТО аспект. Но јас ги прашав дали НАТО и ЕУ ќе не сакаат ако банкротираме. Имаме проблем со пругата кон Солун која е многу поважна за нашето стопанство, додаде Кочоска
За третата фаза од железничкиот Коридор 8, од Крива Паланка до границата со Бугарија обезбедени се 560 милиони евра. 350 милион евра се од Европската банка за обнова и развој и од Европската инвестициска банка.
Преку Инвестициската рамка за Западен Балкан земен е грант од 150 милиони евра. А од ИПА 2 програмата 60, 7 милиони евра.
Според, познавачите пренамена е практично невозможно од повеќе причини. Прво пругата е дел од Примарната карта на европските транспортни коридори на Европската Унија. Со било какво поместување на парите за секогаш ќе пропаднат средствата од ИПА програмата.
Откажувањето од проектот ќе значи неизвесност и за можна изградба и потенцијално финансирање од европски пари и на пругата кон Албанија. Дополнително отежнувачка околност за Владата е и тоа што коридорот 8 е дел од таканаречениот НАТО Коридор за мобилност. Првиот меѓународен документ потпишан од оваа Влада беше токму писмото за намери што на Самитот на НАТО во Вашингтон, министерот Владо Мисајловски го потпиша со неговите колеги од Италија, Албанија и Бугарија.
За пругата кон Бугарија може да се каже дека станува збор за децениски проект. За реализацијата постојано се зборува, но крајот на проектот никако да се види.
Ирена Чачкова