Македонскиот амбасадор во Албанија, Данчо Марковски е повикан на консултации со Министерството за надворешни работи (МНР) по објавување на податоците од тамошниот попис. Тој ќе треба да објасни што се случувало пред и за време на пописот, но и да каже какви насоки имал од МНР.
Во кусото соопштение на министерството се наведува дека заради итност, разговорот со амбасадорот Марковски ќе се одржи до крајот на неделава. Во меѓувреме продолжуваат реакциите на здруженијата и партиите на Македонците во Албанија.
Македонската алијанса за европска интеграција (МАЕИ) тврди дека постои пописен фалсификат. Обвинуваат дека бугарските власти со поткуп и притисоци ги натерале Македонците да се декларираат како Бугари. Претставници на Македонците веќе најавија неформален попис за кој велат дека ќе ја покаже вистинската слика за македонско малцинство во Албанија.