Министерката за енергетика Сања Божиновска упати допис до јавноста во кое тврди дека веќе нема бугарски пасош и државјанство и поради тоа не го навела во официјалната биографија.
-Поради транспарентноста за која сите се залагаме на почеток сакам да појаснам дека првиот пат кога добив прашање од новинарите беше дали поседувам бугарско државјанство. Мојот одговор беше не, бидејќи процедурата за отпуст од истото беше финализирана од моја страна, неколку месеци пред воопшто да добијам можност да бидам министерка во владата предводена од ВМРО-ДПМНЕ, тврди Божиновска.
Нејзиното барање за отпуст од бугарското државјанство било прифатено, објаснува министерката, а сите неопходни документи предвидени во постапката биле соодветно поднесени.
-Дополнително, јас веќе ја информирав јавноста дека пасошот со кој располагав е со истечен рок на важност, а од моја страна никогаш не беше поднесено барање за негово продолжување. Ова говори повеќе од јасно за мојата одлучност да се откажам од бугарското државјанство, кое, како што посочив претходно, го поседував исклучиво заради моите деловни активности на територијата на ЕУ. Имајќи го сето ова предвид, јас навистина не би можела да наведам во биографијата дека поседувам бугарско државјанство и пасош, објаснува Божиновска.
-Од друга страна, сакам да истакнам дека, очигледно, поради актуелизирањето на прашањето во врска со македонско-бугарските односи, потпополно сум свесна дека ова има чувствителна природа и сакам да посочам дека целосно го разбирам интересот на новинарите и јавноста. Оттука останувам целосно транспарента и ја објаснувам ситуацијата веќе трет ден по ред, вели таа.
Во биографијата Божиновска освен бугарското не го навела ниту чешкото државјанство, објави 360Степени.
-Дозволете да изразам чудење дека темата за тоа какви дополнителни државјанства поседувам стана актуелна во моментот кога најавив дека бескомпромисно ќе се борам со корупцијата и криминалот и ќе направам ревизија на сите тендери и коруптивни зделки во делот на енергетиката, чии што негативни последици паднаа врз грбот на граѓаните, вели Божиновска која тврди дека ќе биде транспарентна доколку во нејзиниот ресор бидат откриени пропусти и злоупотреби.