До Управниот суд синоќа пристигна тужба од Коалицијата „Европски фронт“ на решението на Државната изборна комисија за прегласувањето во село Ларце во Општина Желино.
Управниот суд сега има 48 часа да одлучи по приемот на тужбата. ДИК на седница не го прифати приговорот од „Европскиот фронт“.
По прегласувањето во избирачко место во Ларце, Коалицијата „Европски фронт“ загуби еден пратеник во однос на резултатите од 8 мај, додека Коалицијата „Вреди“ доби еден пратенички мандат повеќе.
Според првичните резултати по прегласувањето во седум избирачки места во изборните единици 5 и 6 Коалицијата „Твоја Македонија“ предводена од ВМРО-ДПМНЕ останува со 58 пратенички мандати, Коалицијата „Европски фронт“ предводена од ДУИ има 18, исто толку и Коалицијата за европска иднина предводена од СДСМ.
Коалицијата „Вреди“ доби еден пратеник повеќе и сега има 14, додека Движење ЗНАМ за наша Македонија и Левица остануваат со по шест пратенички мандати.