„Доколку трговците не ги усогласат цените и повторно се појави драстично поскапување кај некои артикли и производи, Владата ќе интервенира со неколку мерки за да ги заштити граѓаните“, најави министерот за економија Крешник Бектеши. Замрзнување на цените, воведување на посебни услови за одредени трговци се дел од мерките, а Бектеши не исклучува и затворање на синџири на маркети кои што ќе ги кршат правилата.
Списокот на производи кои ќе имаат ограничена маржа според Законот за нефер трговски практики е веќе подготвен, во наредните 10 дена ќе биде доставен до бизнис заедниците кои треба да го кажат својот став околку листата и евентуално да ја дополнат.
Законот за нефер трговски практики кој завчера беше изгласан во Собранието предвидува да се имплементира најдоцна за шест месеци. Во тој период добавувачите мора да се усогласат со одредбите, а министерството за економија има рок од најмногу три месеци да ја објави листата на продукти кои ќе бидат опфатени и со ограничена маржа.