Шеесет и деветте текстилни работнички од конфекцијата „Сони“ во Кавадарци се олицетворение на овој 8 март, порача Кристина Ампева од „Гласен Текстилец“. Победата на овие работнички е што Апелациониот суд Скопје го врати предметот во Основен суд Кавадарци.
Тие со првостепената пресуда беа задолжени да си ги платат судските трошоци во висина од 20.000 евра, поради тоа што изгубиле спор за неисплатени плати и други додатоци. Една од работничките и почина, лани во март имаше и протести од страна на работничките. Според Ампева ова беше една од најсрамните пресуди за работниците во земјава, кои останаа и без плати, но и должни и кон судската власт.
Битката за правата на овие текстилни работнички продолжува наредниот месец во судницата во Основниот суд во Кавадарци. Ампева на денешната прес-конференција истакна дека и по повеќе од еден век, направен е напредок, но сме далеку од првичната идеја за рамноправност помеѓу мажот и жената.
Работничките и работниците во земјава мора да ги знаат своите работнички права, но сè уште имаме примери работници без да имаат копии од договорите за вработување, потпишување на бели листови, па и враќање на пари во плик.
Викторија Јованова