Личните документи се базична должност што ја има државата кон секој што е нејзин граѓанин. Да претпоставиме дека проблемот не е во промена на името. Тие се менуваат и поради други причини. Такво искуство имавме со биометриските. Ако тоа не успеале да ги испланираат и направат, што е тоа што можат да го направат, вели аналитичарот Бесим Небиу во вечерашната дебата во „Вин-Вин“ на Телма ТВ.
„Тоа е прилично едноставна операција. Може да се објаснува на овој или оној начин, меѓутоа нема објаснување. Прилично лошо делува и мислам дека ќе има ефект. Цела недела е доминантна тема, дури и претседателските избори паднаа во втор план. Ќе остане таква, бидејќи нема изгледи дека сите ќе добијат пасош пред изборите. Ова е сосема легитимна тема за опозицијата да поентира. Лошо изгледа за власта, бидејќи власта ги води институциите и ќе одврати одреден дел од луѓето кои можеби размислувале дека ќе гласаат за нив. Зборувам за неопределените, настрана „милитантите“ и партиски определените луѓе“, смета Небиу.