Апсолутно сметам дека ова што се случи со патните исправи и документите генерално и „last minute“ спасување на ситуацијата со возачките дозволи, многу повеќе може да влијае и одземе од рејтингот на оние кои се одговорни за ситуацијата која настана, отколку промена на името, ветото од Бугарија, итн., истакна политикологот Ненад Марковиќ во вечерашната дебата во „Вин-Вин“ на ТВ Телма.
„Луѓето, дел од нив, сериозно се соочуваат со неможност да се изборат за својата егзистенција, како што се превозници, шпедитери, такси возачи кои можеби возат и меѓународни тури“, вели Марковиќ.
Според Марковиќ, проблемот е настанат во оној момент кога продолжиле да се издаваат пасоши без придавката Северна, а Преспанскиот договор веќе стапил на сила и изгласани биле уставните измени.
„Коренот на проблемот е таму. Можеби немаше да решиме 100 проценти, ама ќе решевме добар дел и немаше да биде ваква драма на социјалните мрежи на кои 97 отсто од постовите се посветени на оваа тема. Да, некој може да излезе и каже дека 650.000 граѓани нема одеднаш да излезат од државата, меѓутоа дали некој е свесен колкав е степенот на негативна енергија и пизма која постои кај луѓето и која е апсолутно оправдана“, смета Марковиќ.
