Кривичниот совет во скопскиот Кривичен суд сè уште не донел одлука по жалбата на обвинителството за мерката куќен притвор за Лабинот Ќерими, кој е осомничен за упадот во М-НАВ. Ќерими беше фатен на граничниот премин Блаце во петокот. Тој е дел од групата на четири лица кои беа недостапни за органите на прогонот по инцидентот во контролата на летање на 4 јануари.
По него беше распишана централна потерница и откако МВР го пронајде, обвинителството побара затворски притвор. Осомничениот Ќерими, како што претходно објави Телма, додека бил вработен во М-НАВ, истовремено шест месеци печалел и во Германија, па кога го фатиле, сам си дал отказ во македонска навигација.
На социјалните мрежи сè уште пишува дека е вработен во М-НАВ. Според извори на КОД, Ќерими е баџанак на Беким Незири, исто така осомничен за упадот и координатор на ДУИ во Чаир. Со Ќерими во Германија бил и Рамадан Брава, кој е во куќен притвор за случајот.