Фирма на бизнис партнер на соработник на Фондот за иновации и технолошки развој добила грант од 40 илјади евра од Фондот. Опозицијата обвинува за конфликт на интереси. Во Фондот негираат.
Фирмата Зеро-оне солутионс доби грант од 2 милиони и 456 илјади денари, или околу 40 илјади евра од ФИТР за проект за електронски интегриран систем за комуникации. Сопственик на оваа фирма е Фатмир Шакири. Истиот човек е косопственик на фирмата Тридот, заедно со Висар Рамадани, соработник во Фондот за иновации.
Пратеникот Јован Јаулески од ВМРО-ДПМНЕ претходно објави дека грант добила фирмата ТРИДОТ, но подоцна се исправи дека се работи за Зеро-оне солутионс и праша дали во случајов има конфликт на интереси.
Директорот на ФИТР негира какво било влијание при изборот на компании кои добиваат грант од Фондот. Вработените во Фондот не одлучуваат за тоа. Комисијата што ги оценува апликациите е составена од странци, вели тој.
„Ниту Висар Рамадани, ниту некој од вработени во Фондот за иновации и технолошки развој може да одлучи која компанија ќе биде грантист“, изјави директорот Фестим Халили.
Висар Рамадани, пак, ни одговори дека кога фирмата Зеро-оне солутионс аплицирала и го добила грантот, тој немал деловен однос со сопственикот. Тие аплицирале за грантот во јуни, а го добиле на 20 октомври. Заедничката фирма Тридотс била формирана на 25 октомври годинава, но таа ниту барала, ниту добила пари од Фондот.
„Секако би постоел конфликт на интерес ако овој субјект аплицира или добие грант од ФИТР во кој сум ангажиран како надворешен соработник, иако тоа е невозможно затоа што ниту ТРИДОТС ниту јас лично никогаш не би се довеле во ситуација да се аплицира за проект во ФИТР во околности кога еден од основачите или управителот се ангажирани лица во ФИТР“, стои во одговорот на Рамадани.
Инаку, ФИТР одобри 2,3 милиони евра грантови за стартап компании.
Срѓан Стојанчов