Дали ќе ја прифати понудата на опозицијата, ќе настапи самостојно или пак ќе оди со ДУИ со кого во моментов го сочинуваат владеачкото мнозинство се трите можности кои стојат на масата на партијата „Алијанса за Албанците“ за претстојните парламентарни избори. Одлуката ќе се донесе по Нова година и ќе ја донесе централното Собрание на партијата.
Високи партиски извори за Телма брифираат дека контакти има со двете страни и опозицијата и владеачката ДУИ, но во партијата има и силна струја која бара на претстојните избори да се настапи самостојно. За раководството е клучно што гласачкото тело на партијата е традиционално опозициски настроено и затоа мора да се направи длабока анализа и да се најде формулата тие максимално да се мотивираат пред да се донесе било каква одлука. Според нашите извори, интерните анкети покажуваат дека партијата ќе го повтори резултатот од претходните избори и ќе има сигурен број пратеници како што е во моментов за да биде значаен фактор при преговорите за составување на идната Влада.
Иако на 29 декември ќе има состанок на централното претседателство на партијата, евентуалната одлука може да се очекува во првата половина на јануари а ќе ја донесе централното Собрание на партијата.
Вчера од опозициската коалиција „Европски сојуз за промена“ кој го сочинуваат партиите „Демократско движење“, „Беса“ и „Алтернатива“ соопштија дека вратата за Алијанса и Таравари нема да остане уште долго време отворена и тој треба да пресече меѓу клиентелизмот и волјата на неговите гласачи.
Од ДУИ пак засега нема официјален повик за заеднички настап со Алијанса или пак потврда дека се разговара на таа тема со партнерот во Владата.
Огнен Чанчаревиќ