Европската интеграција на Украина, финансиската и воена поддршка за земјата, како и 12-от пакет санкции против Русија, ќе бидат главна тема на разговорите за време на денешната посета на претседателката на Европската комисија (ЕК), Урсула фон дер Лајен на Киев.
„Секогаш имам цел пакет полн со теми за кои треба да разговараме. Започнуваме со прашањето за проширувањето, односно за барањето на Украина да стане членка на Европската Унија. Се продолжува на темата за финансиската и воената поддршка за Украина, но и за прашањата поврзани со 12-от пакет санкции“, изјави Фон Дер Лајен.
Таа нагласи дека секогаш кога патува во Украина има одредено чувство на тензија, што е разбирливо бидејќи земјата е воена зона, но и цврсто уверување дека носи охрабрување и поттик.
„Уште еднаш да ја увериме Украина дека цврсто стоиме покрај неа“, додаде претседателката на ЕК.
Фон дер Лајен истакна дека нејзиното денешно патување во Украина е во рамки на пакетот посети на земјите кандидати за членство во ЕУ пред објавувањето на најновиот извештајот за нивниот напредок на европскиот пат.
Во објава на платформата Икс таа нагласи дека целта на нејзината шеста воена посета на Киев е да разговара и за финансиската поддршка на ЕУ за обнова на Украина како модерна и просперитетна демократија, но и за тоа „како да ја натераме Русија да плати за својата агресивна војна“.
Според најавите, предвидено е Фон дер Лајен во Киев да има средби со украинскиот претседател Володимир Зеленски и со премиерот Денис Шмихал, како и да се обрати пред пратениците во Врховната Рада. Таа, заедно со првата дама на Украина, Олена Зеленска ќе присуства на настан на донација на автобуси, а ќе посети и центар за заштита на децата.