Егзекуторот кој го чекал Штекли во Ист гејт мол стигнал со такси, не го криел лицето, успеал да истрела 7 куршуми кон двете жртви, по што ладнокрвно избегал на вратата на главниот влез на молот додека Штекли со позајмена (украдена) туѓа кола го носел придружникот Димитар во старата градска болница и успеал да го спаси.
Ова се детали од реконструкцијата која КОД ја направи за последната престрелка во молот во кој во два наврати за два месеци, цел беше Раде Трајковски -Штекли.
Трајковски според министерот Спасовски е познат сторител, но во моментот неговото судско досие е чисто. КОД во оваа емисија ги бара одговорите зошто криминалните пресметки почнаа да се одвиваат на јавни места, каков е одговорот на надлежните кои треба да обезбедат сигурност на граѓаните, дали има пропусти во борбата против криминалните групи и дали единствено нарко-пазарот е причина за престрелките и нападите во кои само последната година беа убиени 5-мина високопозиционирани членови на групите Грчец и Беланоца.
На што се должат вооружените пресметки низ Скопје? Додека Министерот Спасовски чита статистики и се фали со успешни реализации во уличните пресметки вклучени се три групи. Дуќанџик против Беланоца и Барон. Локациски би се рекло и групата од Арачиново и онаа од Грчец. Многу испукани куршуми многу мртви тела а решени убиства речиси и да нема.
Во КОД интервју со скопскиот јавен обвинител Гаврил Бубевски кој открива дека обвинителство има посебен тим кој ги анализира истрагите и досегашните пресметки на скопските криминални кланови Дуќанџик и Беланоца. Како заклучок на сите истраги е што убијците користат украдени автомобили или регистрации кои потоа ги уништуваат.
Бубевски тврди дека има и правен проблем бидејќи со одлука на Врховниот суд од пред 15-тина години, како организирана криминална група се смета онаа која има најмалку три основачи или организатори. Таа одлука ја смета за апсурдна.
Емисијата „Војната на скопските банди и напад врз Штекли“ е емитувана на 29.10.2023.