Ниту една членка на Асоцијацијата на спортски обложувалници на Македонија (АСОМ) нема да учествува на тендерот распишан од Државна Лотарија на Македонија. Сметаат дека е наместен, незаконски и дискриминаторски за домашните компании. Подигнале тендерска документација, но само за да ги видат условите, а не како што тврдат од Лотарија, за да учествуваат на тендерот.
Од Лотарија неодамна процесот го претставија како транспарентен и законски, затоа што тендерска документација подигнале повеќе од 10 компании од кои половина се домашни. Но, за Асоцијацијата во која членуваат над 95 отсто од домашните компании, ова е чиста манипулација. Бараат од владата целосно да ја поништи одлуката за формирање на три нови друштва за приредување на игри на среќа преку интернет. Во спротивно, ќе излезат на масовни протести.
Против овој закон е и друга организација.
Опозицијата се сомнева дека од понеделник ќе има нов обид од мнозинството, на пленарна седница, со европско знаменце да мине потребата од носење на законот, во кој покрај дислокација на казината и обложувалниците на над 500 метри од училиштата, ќе се легализираат три онлајн казина и една нова компанија за слот машини.
Освен ВМРО-ДПМНЕ, против овој закон се и останатите опозициски партии. Обвинуваат дека главни партнери во овој бизнис се вработени во кабинетот на Артан Груби, партијата ДУИ и контроверзни ликови од соседна Бугарија, како што е Васил Божков – Черепот, чии фирми се наоѓаат на црната листа на САД. Обвинуваат дека тендерот е како скица за бугарската фирма на Черепот, за што бараат и Јавното обвинителство да отвори случај.
Далиборка Демјанска Цветановска