3.500 лајкови за Мицкоски наспроти 2.700 за Груевски. Фејсбук војната меѓу актуелниот и поранешниот претседател на ВМРО-ДПМНЕ го подели и членството. Во коментарите едни му даваат поддршка на првиот, други на вториот, трети бараат да не се караат како жени на сред село и да ги тргнат суетите на страна затоа што „раздорот оди во корист на непријателот“.
Пратеници и градоначалници продолжуваат со јавна поддршка за актуелниот претседател, а на негова страна застана и премиерот со најмал стаж, Емил Димитриев. Заседаваат партиските тела, а Мицкоски кој тврди дека партијата никогаш не била пообединета денеска сепак испрати порака и до членството.
Со последниве случувања, според Мицкоски, како меур од сапуница е распрсната и лажната кампања на СДСМ дека политиката на партијата се диктира од Будимпешта. Тие, пак, и денеска повикаа да бидат изземени од пресметката.
Политичкиот циркус почна со донесувањето на измените на Кривичниот законик кои разгореа шпекулации дека треба да обезбедат и тивка амнестија за поранешниот премиер во замена за поддршка за уставните измени. Дополнително се разгоре со интервјуто на Ахмети во кое тој зборуваше за средби со Груевски. Кулминираше со тврдењето на ВМРО-ДПМНЕ дека поседуваат и документи за средби и преписка на Груевски со лица од актуелната власт.
Далиборка Демјанска Цветановска