Од фармите и магацините кон маркетите цената засега иста, но најавите се дека во иднина цените на сирењето, кашкавалот, јогуртот ќе растат. За колкав скок засега производителите не откриваат, но за Tелма ја потврдија информацијата. Откако се укина мерката за замрзнување, сега цената на производите ја одредуваат трговците и маркетите. Во обиколката што ја направивме низ големите маркети забележавме дека цените полека одат во нагорна линија. Најевтиното млеко е над шеесет и пет денари, јогурт се продава по цена под 70 денари која најчесто може да се најде само ако производот е на акција. Најевтиното сирење и кашкавал изнесува околу петстотини денари килограм. Кременадлите, ребрата, меленото месо и останатото свежо месо останува со иста цена тврдат од Здруженијата за свињарство.
Двете здруженија на производители на свињи, кои го обезбедуваат во потполност пазарот на свежо свинско месо преку задоволување на домашните потреби од месо од повеќе од 100%, цврсто стојат на ставот дека нема место за криза и грижи, се додека суверено со сопствени сили го задоволуваме нашиот пазар со виско-квалитетно македонско свежо месо наменето за конзум, велат од здруженијата за свињарство – Македонско прасе и Гицко
На почетокот на август домашните месо преработувачи бараа намалување на царините за замрзнато свинско месо наменето за преработка. Истакнаа дека тоа им е неопходно за да не стават клуч на врата.
Според државната статистика храната за една година поскапела за 12%. Нејзиниот раст се очекува да се зголеми и во иднина затоа што ДДВ-то на одредени продукти од септември ќе се зголеми од 5 на 10%, но за кои производи не се знае се уште.
Тамара Марковска