Косово е отворено за можноста за нови избори во четирите општини со мнозинско српско население на северот на Косово по настанатите немири, но пред тоа треба да се преземат други чекори, изјави косовската министерка за надворешни работи, Доника Гервала-Шварц.
Говорејќи по средбата со чешкиот министер за надворешни работи во Прага, таа рече дека прекинот на насилството е првиот услов.
Одржувањето на нови локални избори во општините со мнозинско српско население во Косово е барањето кое САД и Европската Унија го упатија до Приштина по избивањето на тензиите на северот од земјата.
Немирите настанаа откако косовските власти поставија новите градоначалници, етнички Албанци, во општините со мнозинско српско население по изборите со излезност од само 3,5 проценти, што, пак, ги налути Србите кои се мнозинство во регионот и кои ги бојкотираа локалните избори.
