Западните земји забрзано ги евакуираат своите државјани и дипломатски мисии од Картум. Американската армија, користејќи хеликоптери, ја заврши операцијата за неполн час по разгорување на борбите меѓу војската на Судан и паравоената група „Сили за брза поддршка“. Во тек се мисии за извлекување на свои граѓани и дипломати и на Франција, Велика Британија, Кина, Холандија и други земји, меѓу кои и Србија.
Во Картум од утрово одекнуваат силни експлозии на артилериски проектили, а војската дејствува и со борбени авиони врз ривалските позиции. Борби се водат и околу претседателската палата во Судан, зградата на главниот штаб на суданската војска, но и околу меѓународниот аеродром кој е затворен.
Според дипломатски извори, суданските паравоени Сили за брза поддршка дале безбедносни гаранции за евакуација на странските државјани од Судан.
Обединетите нации и западните земји ги повикаа завојуваните страни да го почитуваат примирјето, што воглавно беше игнорирано. Но, и да отворат безбеден мост за цивилите и потребната помош. Сепак, со затворен аеродром и несигурен воздушен простор, илјадници странци, хуманитарни работници и студенти останаа заглавени во Картум.
Војната во Судан почна на 15 април поради спор меѓу началникот на националната армија Абдел Фатах ал-Бурхан и водачот на паравоените „Сили за брза поддршка, Мохамед Хамдан Дагло за доминација и превласт во земјата.
Сашко Димовски