Со развиорени руски знамиња, концерти и митинзи Крим слави 9 години од неговата анексија од страна на Руската Федерација што властите на полуостровот ја нарекоа „повторно обединување“.
Утрово на врвот на Белата карпа на Крим беше подигнато огромно руско знаме, а прослави по тој повод денеска се одржуваат и во неколку руски градови.
Руската анексија на Крим во 2014 година дојде само неколку дена откако масовните улични протести го принудија про-рускиот претседател на Украина, Виктор Јанукович, да ја напушти земјата.
Анексијата на Крим и последователниот бунт поддржан од Москва во источна Украина го поттикна Западот да воведе економски и финансиски санкции кон Русија.
Тоа се смета и како почеток на денешната руска инвазија во источна Украина во која илјадници луѓе досега ги изгубија животите, а милиони се раселени.